Les prézintreces

Les definixhants årtikes

• li djoû, li djoûrneye, l' ome
• les djoûs, les djoûrneyes, les omes
• dji voe l' djoû, dji voe l's efants

Come on l' voet dins les egzimpes pa dzeu, i gn a nole diferince, è walon, inte li femrin eyèt l' omrin (a pus ki dins des pårlers årdinwès k' i gn a). L' årtike sipotchî l' si lôye a certinnès dvancetes k' i shût: al, dal, sol, el, pal, pol.

• dji m' va al fiesse (je vais à la fête); li tåte dal kimere (la tarte / la tartine de la femme); li lîve est sol tåve (le livre est sur la table); dj' a vnou pal bwès (je suis venu par le bois); li bistoke est pol mame (le cadeau est pour la mère); dji boe del bîre (je bois de la bière).

Bråmint des nos di rivîre s' eployèt sins årtike.

• Moûze est bele (la Meuse est belle), Sambe (la Sambre), l' aiwe di Lesse (la Lesse), l' aiwe d' Oûte (l'Ourthe)

Les mots tere èt messe s' eployèt sovint sins årtike.

• dins tere ou è tere (dans la terre), å rés' di tere (à ras de la terre), aler a messe (aller à la messe), dîre messe (célébrer la messe), sièrvi messe (servir la messe), aler a vepes (aller aux vêpres), etc.

Li walon boute sovint èn årtike avou les nos di djins.

• li Lînåd esteut on pô ramwinri (Léonard avait un peu maigri), dj' a veyou l' Fatima (j'ai vu Fatima)

Les årtikes nén definixhants

• on trin, èn efant, ene vweteure
• des trins, des efants, des vweteures, bråmint d's efants.
• dji voe 'ne vweteure, dji voe 'n efant

Les pårtixhants artikes

• do vén, del bîre, des tomates, des ous

On-z eploye on pårtixhant årtike pa dvant on no, on prono ou ene troke adjectif + no.

• des foitès djins (de fortes personnes); i fåreut des ôtes (il en faudrait d'autres); del måle bîre (de la mauvaise bière)

Avou on mot di niyaedje, li pårtixhant årtike divént pont di eyèt pupont di:

• dji n' a pont d' aiwe (je n'ai pas d'eau); dji n' a pupont d' aiwe (je n'ai plus d'eau)

On-z eploye cåzu tofer des pårtixhants årtikes avou les adviebes di cwantité.

• bråmint del såce (beaucoup de sauce); tot plin do pwin (beaucoup de pain); merci bråmint des côps (merci beaucoup); i gn a waire del bîre (il n'y a pas beaucoup de bière); il a dit beacôp des vraiyes (il a dit beaucoup de choses vraies)

Les rastrindous årtikes

On rastrindou årtike e-st on definixhant årtike eyèt 'ne divancete. I gn a bråmint è walon.

• a + li $\rightarrow$ å, al: dji m' va å bwès (je vais au bois); dji m' va al cinse (je vais à la ferme)
• a + les $\rightarrow$ ås ou åzès: dji djåze ås djins, ås efants (je parle aux gens, aux enfants) ou dji djåze åzès djins, åzès efants (je parle aux gens, aux enfants)
• di + li $\rightarrow$ do, del: li voye do bwès (la route du bois); li toet del måjhon (le toit de la maison)
• di + les $\rightarrow$ des: li tchanson des oujhês (la chanson des oiseaux)
• di + a + li $\rightarrow$ då, dal: li bic då scolî (le stylo de l'écolier); li cote dal båshele (la jupe de la fille)
• di + a + les $\rightarrow$ dås ou dåzès: c' est l' tchén dås vejhins ou c' est l' tchén dåzès vejhins (c'est le chien des voisins)
• pa + li $\rightarrow$ på, pal: dj' a vnou på viyaedje (je suis venu par le village); dj' a vnou pal pîssinte (je suis venu par le sentier)
• pa + les $\rightarrow$ pås, påzès: ç' a stî tchwezi pås efants (ça a été choisi par les enfants); vos vénroz påzès pîssintes (vous viendrez par les sentiers)
• è ou dins + li $\rightarrow$ è, el: metoz l' è ridant (mettez-la dans le tiroir); metoz l' el dresse (mettez-la dans l'armoire)
• è ou dins + les $\rightarrow$ inzès ou ezès: i gn a nolu ezès måjhons (il n'y a personne dans les maisons)

Li rastrindaedje di «a + les» è ås, di «di + les» è des, èt di «pa + li, les» è på, pås èt påzès ni sont nén oblidjîs:

• dji dvize a les efants (je parle aux enfants); dj' a vnou pal $\sim$ pol viyaedje (je suis venu par le village); i m' a tiré l' cou foû d' les strons (il m'a tiré d'un mauvais pas; lit. «le cul hors de la merde»)

Totes les foûmes avou -ès sont facultatives eto:

• dji djåze åzès $\sim$ ås djins (je parle aux gens); c' est l' tchén dåzès $\sim$ des vejhins (c'est le chien des voisins); vos vénroz påzès $\sim$ pa les pîssintes (vous viendrez par les sentiers); i gn a nolu ezès $\sim$ dins ou dvins les måjhons (il n'y a personne dans les maisons)

Mågré k' il ont ene cawete -ès, les årtikes åzès, påzès, dåzès èt ezès siervèt ossi bén pa dvant èn omrin no å pluriel ki pa dvant on femrin no å pluriel.

Les prézintreces d' apartinance

• mi mame, mi efant, c' est m' mame; mes mames, mes efants
• ti mame, ti efant, c' est t' mame; tes mames, tes efants
• si mame; si efant, c' est s' mame; ses mames, ses efants
• nosse mame, noste efant; nos mames, nos efants
• vosse mame, voste efant; vos mames, vos efants
• leu mame, leu-z efant; leus mames, leus efants

On s' sieve foirt sovint è walon (mins nén di tote foice) d' ene prézintrece d' apartinance po djåzer d' on boket do coir.

• dj' a må m' tiesse (j'ai mal à la tête); dj' a froed mes doets (j'ai froid aux doigts); il a 'ne sacwè è s' mwin (il a quelque chose en main); i poite on saetch so si spale (il porte un sac à l'épaule); dj' a må (d') mi stoumak (j'ai mal à l'estomac)

On s' sieve co sovint di nosse po mi po mostrer do respet.

• nosse pa est fayé (mon père est malade); bondjoû, nosse man! (bonjour maman); nosse dame (madame)

On s' sieve di cisse ratoûrneure ci come superlatif:

• il coreut d' tot ses pus roed (il courait aussi vite que possible); criyîz tot vos pus foirt (criez le plus fort possible)

On s' sieve sovint d' ene prézintrece d' apartinance po cåzer d' on hopê di djins:

• i sont leu troes (ou zels troes ou a troes) (ils sont trois); leu cwantes sont i? (combien sont-ils?); i sont leu-z assez (ils sont suffisamment nombreux)

Les prézintreces di mostraedje

• Nén spotcheyes: ci valet, cisse båshele, cist ome, ciste afaire.
• Sipotcheyes: c' est ç' valet la, c' est ç'  båshele la (ou c' est cisse båshele la, sins spotchaedje), c' est ç't ome la (ou c' est cist ome la, sins spotchaedje), c' est ç'te afaire la (ou c' est ciste afaire la, sins spotchaedje).
• ces valets; ces båsheles, ces omes, ces afaires

Å pus sovint, les prézintreces di mostraedje sont-st eployeyes avou les adviebes ci $\sim$ chal $\sim$ vola (po çou k' est près) eyèt la (po çou k' est lon erî):

• cisse cahute ci ou cisse cahute chal ou cisse cahute vola (cette cabane-ci)

Portant, on trove ossu des prézintreces di mostraedje sins adviebe di plaece, apreume è scrît lingaedje ou dins des ratoûrneures totes faites.

• ciste anneye, dji frè di m' mî (cette année, je ferai de mon mieux); cist ome est coupåbe (cet homme est coupable); louke on pô ces tchåpwinnes! (regarde un peu ces grives!); onk di ces cwate (maténs) (un de ces quatre, un jour où l'autre); onk di ces djoûs (un de ces jours)

• ti l' as veyou, m'n ome? (tu l'as vu, celui-là?)

Les prézintreces nén definixhantes

• tchaeke (chaque): tchaeke efant doet vni (chaque enfant doit venir)
• certin, -inne (certain, -e): certinnès båsheles estint la (certaines jeunes filles étaient là)
• d' åcun, d' åkeune (certains, -es): d' åkeunès cmeres (certaines femmes)
• mwint (maints, beaucoup): mwints côps (souvent, maintes fois); mwintès djins vnèt (beaucoup de gens viennent)
• kéke (quelque): kékès crapôdes djowint (quelques petites filles jouaient).
• tos, tot, tote (tous, tout, -e, -es): tos les liârds (tout l'argent); tote li ritchesse (toute la richesse)
• nou, nole (aucun, -e): i gn a nou scolî al fiesse (il n'y a aucun écolier à la fête); i gn a nou risse (il n'y a aucun risque)
• sacwant, -e (quelques; plusieurs): dj' a vnou sacwants côps (je suis venu quelques / plusieurs fois)
• pluzieurs (plusieurs): i nos fårè pluzieurs djoûs (il nous faudra plusieurs jours)
• tot l' minme (li) ké (n'importe quel).

Bråmint di ces prézintreces la polèt prinde li cawete -ès pa dvant on femrin no å pluriel (a pus ki tchaeke èt nou, nole ki s' batixhèt tofer avou li singulî):

• c' est totès mintes (ce ne sont que des mensonges)

Tot, tote, tos, totès si polèt bouter pa dvant on no, on prono ou ene troke do no:

• tote nute (toute la nuit, tout au long de la nuit); tote djoû (toute la journée); tote shîjhe (pendant toute la soirée); tote divant-nonne (toute la matinée); tote voye (pendant tout le trajet); tos nos ôtes (nous tous)

Tot si pout stitchî pa dvant on prono ou èn adviebe:

• dji pudrè tot kî vos vôroz (je prendrai toute personne que vous souhaiterez, n'importe qui); tot cwand vos vnîz (chaque fois que vous veniez); i va tot wice k' on vout (il va partout où on veut); i l' shût tot la k' elle è va (il la suit partout où elle va)

Tot, tote, tos, totès polèt esse eployîs dins li minme sins ki ni...ki:

• c' est tot bwès (ce n'est que du bois); c' est tos bwès (ce ne sont que des bois); ti fais totès (ou tot) biestreyes (tu ne fais que des bêtises); c' est tos schinons (c'est entièrement construit avec des lamelles de coudrier)

Les prézintreces di dmande eyèt d' acertinaedje

• ké tchestea? kén ome?; kéne tåve? kéne afaire?; kés tchesteas? kés ome? kénès tåves? kénès afaires?

Les femrinnès fôumes sont sovint eployeyes po l' omrin:

• ké novele? (quelle nouvelle ?); ké bele cote! ou kéne bele cote ! (quelle belle robe !)

I pout gn avu ene ôte prézintrece pa dvant les prézintreces di dmande eyèt d' acertinaedje:

• li ké djoû avoz vnou? (quel jour êtes-vous venu ?); les kénès belès pomes! (quelles belles pommes!); vosse ké est ce k' il a pris? (lequel des vôtres a-t-il pris ?); des kés solés est ce ki ti vous? (quel genre de souliers désires-tu ?)

I gn a ene ôte prézintrece di dmande: cwant (cwantre pa dvant on mot d' ene sillabe k' atake avou 'ne voyale):

• cwantes feyes vis el fårè-t i dîre? (combien de fois faudra-t-il vous le dire?); cwantre ans av'? (quel âge avez-vous?)